၂၀၀၆ ခုနှစ်- မတ်လ၌ ဆရာဦးစိုးလွင် ဦးဆောင်ပြီး သူငယ်ချင်းဖြစ်သူ ဦးကျော်ဦး + ဒေါက်တာ နန်းတင်တင်ဌေး တို့၏ မန္တလေးမြို့ လမ်း(၃၀)နှင့် (၇၃)လမ်းဒေါင့်၌ ဖွင့်လှစ်ခဲ့သော ကံ့ကော် ဆေးရုံတွင် ကျောင်းနေဖက်သူငယ်ချင်းများနှင့် တရားဓမ္မများကို စတင်ဆွေးနွေး ပြောကြားခဲ့ပါသည်။ ထိုဆွေးနွေးပွဲမှ အစပြု၍ (၁၉၇၆-၈၂) မန္တလေး – ဆေးတက္ကသိုလ် စာသင်နှစ်မှ သူငယ်ချင်းများဖြစ်ကြသော ဒေါက်တာ သက်လွင်၊ ဒေါက်တာ စိန်လှမင်း၊ ဒေါက်တာ အေးစိုး၊ ဒေါက်တာ စိန်မြင့်၊ ဒေါက်တာ ဝင်းအောင်၊ ဒေါက်တာ ခင်မောင်အေး၊ ဒေါက်တာ ကျော်တင့်၊ ဒေါက်တာလှစိုးညွှန့်၊ ဒေါက်တာ နန်းတင်တင်ဌေး၊ ဒေါက်တာ မဌေးဝင်း၊ ဒေါက်တာ သီသီ၊ ဒေါက်တာ မိမိ၊ ဒေါက်တာ စန်းစန်းဝင်းစသော သူငယ်ချင်းများ စုပေါင်းကာ ဓမ္မလမ်း- ၀ိပဿနာအဖွဲ့ကို စတင်မျိုးစေ့ချနိုင်ခဲ့ကြပါသည်။

          ထို့အတူ ရန်ကုန်မြို့၌လည်း ၂၀၀၆ ခုနှစ် အောက်တိုဘာလတွင် ဒေါက်တာရွှေထွန်း၏ နေအိမ်၌ ဒေါက်တာ ခင်မောင်ဖြူ၊ ဒေါက်တာ အောင်ဇော်၊ ဒေါက်တာ တင်ဆွေ၊ ဒေါက်တာ အောင်ကျော်ဝင်း၊ ဒေါက်တာ နေဝင်း ၊ ဒေါက်တာ မြင့်လွင်(ဟိုပင်)၊ ဒေါက်တာ ကြူကြူ၊ ဒေါက်တာ တင်တင်ဝင်း၊ ဒေါက်တာ ကြည်ကြည်စန်း စသော သူငယ်ချင်းများ စုပေါင်းပြီး တရားဓမ္မများကို ဆွေးနွေးပြောကြားခဲ့ကြပါသည်။

          ဤသို့ ဓမ္မလမ်းအဖွဲ့အဖြစ် သူငယ်ချင်းများဖြင့် စတင်စုစည်းနိုင်ခဲ့ကာ မန္တလေးမြို့တွင် ဒေါက်တာ အေးစိုး + ဒေါ်စောကြည်ထူးတို့၏ နေအိမ်၌လည်းကောင်း၊ ဒေါက်တာ သီသီ၏ နေအိမ်၌လည်းကောင်း၊ ဓမ္မမိတ်ဆွေတစ်ဦးဖြစ်သော ဦးတင်လှိုင် + ဒေါ်ယုဝေတို့ နေအိမ်၌လည်းကောင်း၊ သင်္ကြန်ပွဲတော်ရက်များ၊ သီတင်းကျွတ်ကျောင်းပိတ်ရက်များနှင့် ဒီဇင်ဘာလ ဆရာကန်တော့ပွဲရက်များတွင် သူငယ်ချင်းများ စုပေါင်းပြီး တရားဓမ္မများကို ဆွေးနွေး ပြောကြားခဲ့ကြပါသည်။ ရန်ကုန်မြို့တွင်လည်း ဒေါက်တာ ရွှေထွန်း၊ ဒေါက်တာ ခင်မောင်ဖြူ နေအိမ်တို့၌ အပတ်စဉ် စနေ၊ တနင်္ဂနွေနေ့များတွင် သူငယ်ချင်းများစုပေါင်းကာ တရားဓမ္မများကို ဆွေးနွေးပြောကြားခဲ့ကြပါသည်။ ၂၀၀၆မှ ၂၀၁ဝထိ ရန်ကုန်် မန္တလေး စုန်ချီဆန်ချီ တရားဆွေးနွေး ပြောကြားခဲ့ပါသည်။

          ထိုကဲ့သို့ တရားလုပ်ငန်းတို့ကို စဉ်ဆက်မပြတ် ဆောင်ရွက်ရင်း ဒေါက်တာ သက်လွင်၊ ဒေါက်တာ စိန်လှမင်း၊ ဒေါက်တာ အေးစိုး၊ ဒေါက်တာ စိန်မြင့်၊ ဒေါက်တာ သီသီနှင့် ဒေါက်တာ မိမိ စသော သူငယ်ချင်းများသည် တစ်ဦးလျှင် ကျပ်တစ်သိန်းစီ မတည်၍ ဆွေးနွေးပြောကြားခဲ့သော တရားဓမ္မ များကို စာအုပ်အဖြစ်လည်းကောင်း၊ ရုပ်/သံအားဖြင့်လည်းကောင်း မှတ်တမ်းတင်နိုင်ရန် ရံပုံငွေကို တည်ထောင်ခဲ့ပါ သည်။

          ဤသို့ဖြင့် ၂၀၀၉-ခုနှစ် ဒီဇင်ဘာလတွင် မန္တလေးဆေးတက္ကသိုလ် (၁၉၇၆-၈၂) စာသင်နှစ်၏ ဒသမအကြိမ်မြောက် အာစရိယပူဇော်ပွဲတွင် “ဓမ္မလမ်းကို လျှောက်ကြမယ်“ ဓမ္မစာအုပ်ဖြင့် ဆရာဆရာမများကို ပူဇော်ကန်တော့နိုင်ခဲ့သည့်အပြင် သူငယ်ချင်းများကိုလည်း ဓမ္မလမ်းကြောင်းပေါ်ကို ဆွဲခေါ်ခဲ့ပါသည်။ “ဓမ္မလမ်းကို လျှောက်ကြမယ်“ စာအုပ်ကို အစွဲပြု၍ “ဓမ္မလမ်းအဖွဲ့“ အနေဖြင့် ပီပီပြင်ပြင် ဖွဲ့စည်းနိုင်ခဲ့ပါသည်။